शुक्रबार नेपालमा राजतन्त्रवादीहरूको भिँडले एभेन्युज टेलिभिजनका पत्रकार सुरेश रजकको आगो लगाएर हत्या ग¥यो । सामाजिक सञ्जालमा आएका भिडियोमा उनि थुनिएकै अवस्थामा मोबाइलबाट कसैसँग सम्पर्क गर्नचाहिरहेको देख्न सकिन्छ । सम्भवतः उनले त्यस टेलिभिजनका सञ्चालक भाष्कर राज कर्णिकारलाई पनि जानकारी गराएका हुनसक्छन् ।
उनलाई आन्दोलनकारीले रिपोटिङ गरिरहेको घरभित्रै थुनेर ताल्चा लगाइदिएका थिए । आन्दोलनको अघिल्लो दिन आन्दोलनलाई उक्साउने गरि ‘प्रबुद्ध’ समूह नाममा केही राजतन्त्रवादी उद्यमीसहित केही नामचलेका पत्रकारहरूले विज्ञप्ती निकालेका थिए । त्यो विज्ञप्ती निकाल्ने र भेला आयोजना गर्नेहरूमा न्युज २४ टिभीका सञ्चालक अनिल जोशी सहित स्वयं कर्णिकार प्रमुख हर्ताकर्ता थिए ।
कर्णिकारलाई जानकारी गराउँदा गराउँदै उनले पत्रकार सुरेशलाई ताल्चा लगाएको ठाउँमै पुगेर ताल्चा तोडेर निकाल्नलाई उदासिनता देखाए । यद्दपी कर्णिकारले काठमाडौंका प्रमुख जिल्ला अधिकारी, सशस्त्र प्रहरी बलका प्रमुख सहित नेपाल प्रहरी प्रमुखलाई पनि उनको उद्धारका निमित्त गुहार मागेको बताएका छन् ।
तर, जे भएता पनि हिंश्रक आन्दोलनमा परि फेरि एक होनहार पत्रकारले ज्यान गुमाए । यसबाट नेपालको सिंगो पत्रकारिता जगतमा डरको माहौल सिर्जना भएको छ ।
पत्रकार सुरेशको हत्या तथा मिडिया हाउस तोडफोड विरुद्ध नेपाल पत्रकार महासंघले देशव्यापी विरोधसभा गरेको छ ।
यसअघि माओवादीको दश वर्षे सशत्र द्वन्द्वकालमा कृष्णसेन इच्छुक, टेकेन्द्र थापा, उमाकुमारी सिंह लगायतका थुप्रै होनहार पत्रकारहरूको हत्या भएको थियो ।
सन्सारभरमा नै पत्रकारिता एउटा जोखिमपूर्ण कामको रुपमा लिइन्छ । थुप्रै पत्रकारहरू अहिले पनि जोखिम मोलेरै आफ्नो कर्तव्यपथमा निरन्तर लागिपरिरहेका छन् ।
लोकतन्त्रको आधार स्तम्भमध्येको एक पत्रकारिता पनि हो । त्रासको अवस्थामा कुनै पनि पत्रकारलाई सही रिपोटिङ गर्न कठिन हुन्छ । आगामी दिनमा पत्रकार महासंघ नेपाल, मिडिया सञ्चालक, नेपाल सरकार, राजनीतिक दल तथा सरोकारवाला सबै निकायले पत्रकारको जिवनरक्षाको निमित्त विशेष ध्यान दिन आवश्यक छ ।
हामी पत्रकार सुरेश सहित सम्पूर्ण ज्ञात–अज्ञात पत्रकार सहिदहरूप्रति हार्दिक श्रद्धाञ्जली अर्पण गर्दछौं ।
