भरतपुर , नेपाल । चितवन जिल्लाको रत्ननगर नगरपालिका–०६ स्थित बछौली माविको भवन निर्माणको शिलान्यास कार्यक्रम आज सम्पन्न भएको छ । यो आयोजना नेपाल–भारत विकास सहयोग अन्तर्गत सञ्चालित छ । सो अवसरमा भारतीय महावाणिज्य दूतावास वीरगन्जका महावाणिज्यदूत देवी सहाय मीना र रत्ननगर नगरपालिकाका मेयर प्रह्लाद सापकोटाले संयुक्त रुपमा शिलान्यास गरेका थिए । कार्यक्रममा जनप्रतिनिधि, सरकारी कर्मचारी, समाजसेवी, विद्यालयका शिक्षक, विद्यार्थी तथा अभिभावक, नेपाल–भारत मैत्री संघका सदस्य, छापा तथा विद्युतीय सञ्चारमाध्यमका पत्रकार, स्थानीय नागरिक तथा नागरिक समाजका सदस्यहरुको उपस्थिति रहेको थियो ।

परियोजना विवरणहरू

बछौली माविको भवन निर्माणका लागि भारत सरकारबाट ‘नेपाल–भारत विकास सहयोग’ अन्तर्गत ३ करोड ५ लाख नेपाली रुपैयाँ आर्थिक सहयोग उपलब्ध गराइएको छ । यस आयोजनाअन्तर्गत तीन तहको विद्यालय भवन र अन्य आवश्यक सुविधाहरू निर्माण गरिनेछ। उच्च प्रभाव सामुदायिक विकास परियोजना (एचआईसीडीपी) को रूपमा ग्रहण गरिएको यो परियोजना चितवनको रत्ननगर नगरपालिका मार्फत कार्यान्वयन भइरहेको छ।

विद्यालय इतिहास र लाभहरू

बछौली माध्यमिक विद्यालय सन् १९६२ मा स्थापना भएको हो। यस विद्यालयले नर्सरीदेखि कक्षा १२ सम्मको शिक्षा प्रदान गर्दछ। साथै, यसले सिटिइभिटि सँग सम्बद्ध होटल व्यवस्थापनमा डिप्लोमा पाठ्यक्रमहरू पनि सञ्चालन गर्दछ। हाल यस विद्यालयमा करिब ६५० विद्यार्थी अध्ययनरत छन्, जसमध्ये ५१ प्रतिशत बालिका छन् । यस नयाँ पूर्वाधारको निर्माणले विद्यालयलाई आवश्यक कक्षाकोठा उपलब्ध गराउने छ, जसले विद्यार्थीहरूको लागि राम्रो सिकाइ वातावरण सिर्जना गर्नेछ र शिक्षाको क्षेत्रको समग्र विकासलाई प्रवर्द्धन गर्नेछ।

नेपाल–भारत विकास सहयोग अन्तर्गतका अन्य आयोजनाहरु

सन् २००३ देखि भारत सरकारले नेपालमा विभिन्न क्षेत्रमा ५६३ उच्च प्रभाव सामुदायिक विकास परियोजनाहरू (एचआईसीडीपी) थालेको छ, जसमध्ये ४९५ परियोजनाहरू सम्पन्न भएका छन्। जसमध्ये चितवन जिल्लाका १० आयोजनासहित वाग्मती प्रदेशमा १०८ आयोजना कार्यान्वयनमा आएका छन् । यसका साथै भारत सरकारले नेपालका विभिन्न अस्पताल, स्वास्थ्य केन्द्र र शैक्षिक संस्थालाई १ सय ९ एम्बुलेन्स र ३ सय स्कुल बस उपलब्ध गराएको छ । जसमध्ये बागमती प्रदेशलाई २ सय ३६ एम्बुलेन्स र १ सय स्कुल बस, १७ एम्बुलेन्स र ५ स्कुल बस चितवनलाई उपलब्ध गराइएको छ ।

नेपाल–भारत सहकार्यको महत्व

भारत र नेपालबीच घनिष्ठ सम्बन्ध छ र दुवै देश बहुक्षेत्रीय सहयोगमा संलग्न छन्। एचआइएसडिपिको कार्यान्वयनले नेपालको पूर्वाधार सुदृढीकरणमा भारत सरकारको निरन्तर सहयोगलाई झल्काउँछ। यो सहकार्य नेपालको प्राथमिकता अनुसार शिक्षा, स्वास्थ्य, पूर्वाधार र अन्य महत्वपूर्ण क्षेत्रहरूमा दिगो विकासलाई प्रवर्द्धन गर्न हो।