काठमाडौं । राजधानीको तीनकुनेमा भएको हिंसात्मक घटनापछि राजावादी समूहका ‘कमान्डर’ दुर्गा प्रसाईं भागेपछि राजावादी आन्दोलन तुहिएको छ । ‘राजसंस्था पुनस्र्थापनाका लागि संयुक्त जनआन्दोलन समिति’ र दुर्गा प्रसाईंको नेतृत्वमा भएको शुक्रबारको प्रदर्शन हिंसात्मक बनेको थियो ।
हिंसाका कारण फोटोपत्रकार सुरेश रजक र सर्वसाधारण सविन महर्जनको मृत्यु भएको थियो भने दर्जनौं घाइते भएका छन् । त्यसलगायत जडिबुटी स्थित जडिबुटी उद्योग तथा तिनकुने स्थित एक घरका साथै अन्नुपूर्ण पोस्ट दैनिकको कार्यालयमा सो उत्तेजित समूहले आगजनी गरेको थियो । उक्त अराजक समूहले कोटेश्वरस्थित भाटभेटनीबाट मदिरा, मोबाइल फोन, घडी, कपडा तथा फलफूल लुटपाट गरेको थियो ।
घाइतेमध्ये ७१ जना सुरक्षाकर्मी डिस्चार्ज भएका छन्, भने ५१ जना प्रदर्शनकारीमध्ये ३५ जना डिस्चार्ज भएका छन् ।
पन्ध्र लाखको संख्यामा राजावादी भिँड जुटाउने तयारी गरेर संसद भवन, सिंहदवार, एयरपोर्ट कब्जा गरेर नारायणहिटीमा शाह वंशका अन्तिम राजा ज्ञानेन्द्रलाई सिंहासनमा बसाउने तयारी गरिएको थियो । तर, सोचे जस्तो भिँड जम्मा नभएपछि जति छन्, त्यतिलाई नै उत्तेजित पारेर तोडफोड मच्चाउन राजावादी अगुवाहरु दुर्गा प्रसाई, धवल शमसेर राणा, रविन्द्र मित्र लगायतले भगिरथ प्रयत्न गरेका थिए ।
भिँड भडकाउ प्रसाईं स्वयं गाडि चलाएर निषेधित क्षेत्र तोडेका थिए । तोडनेक्रममा उनले बाटो छेकेर बसेका प्रहरी समूहलाई किचेर अघि बढ्ने गरि गाडि हुँक्याएका थिए ।
त्यसपछि स्थिती भड्कियो र भिड हिंसामा उत्रियो । स्थितीपछि पक्राउ परिने डरले प्रसाईं एक सटरभित्र चारघण्टासम्म लुकेका थिए । त्यहाँबाट निजि सुरक्षा दस्ताको सहयोगमा हतार हतार गाडीमा चढेर हिँडेका प्रसाईं मोबाइल स्विच अफ गरेर बेपत्ता छन् । प्रहरीले उनको खोजी तिब्र बनाएको छ भने विदेश उडेर भाग्न सक्ने आशंकामा उनको पासपोर्टलाई ‘ब्ल्याक लिस्टेट’ गर्ने तयारी गरिएको छ ।
प्रदर्शनमा भाग लिएका राजावादी नेताहरू राप्रपाका उपाध्यक्ष मिश्र र महामन्त्री राणा तथा स्वागत नेपाललाई पक्राउ गरिएको छ । संयुक्त आन्दोलन समितिका संयोजक नवराज सुवेदीलाई भने ‘नजरबन्द’मा राखिएको छ । मुख्य योजनाकारको रुपमा शाहलाई अघोषित नजरबन्दमा राखिएको छ । उनको सुरक्षा दस्ता पनि फेरिएको छ भने अंगरक्षको संख्या पनि घटाइएको छ ।
घटनापछि आन्दोलन समितिले थप कार्यक्रम गर्न असमर्थ भएको जनाएको छ र नेताहरूको गिरफ्तारीले आन्दोलनमा अन्योल उत्पन्न गरेको छ ।
सुवेदीले चैत १६ पछि आन्दोलनका थप कार्यक्रम घोषणा गर्ने बताएका थिए । उनले सरकारलाई शान्तिपूर्ण आग्रहलाई बेवास्ता गरे सशक्त आन्दोलनको चेतावनी पनि दिएका थिए । राप्रपाले भने आफ्नै ढंगले आन्दोलन अघि बढाउने तयारी गरेको छ । पार्टी अध्यक्ष राजेन्द्र लिङ्देनले चैत २६ र वैशाख ७ मा प्रदर्शन गर्ने योजना बनाएका छन् ।
राप्रपाले तीनकुने घटनाको स्वतन्त्र र निष्पक्ष जाँचको माग पनि गरेको छ । लिङ्देनले हिंसात्मक गतिविधिको विरोध गर्दै राप्रपा हिंसाको पक्षमा छैन भनी स्पष्ट पारेका छन् । उनले भने, “जसले जुन उद्धेश्यका लागि हिंसात्मक गतिविधि गरेको भए पनि निन्दनीय छ ।”
यस घटनाबारे राजावादी र सरकारबीचको तनाव जारी रहेको छ, र आगामी दिनमा आन्दोलनको दिशा के हुने भन्ने विषयमा अन्योल नै छ ।
