गत बुधवार राष्ट्रियसभाको बैठकमा सांसदहरूले उठाएका प्रश्नको जवाफ दिँदै ऊर्जामन्त्री दीपक खड्काले अब लोडसेडिङ रोक्न नसकिने बताएका छन् ।
उनले भारतबाट ८२३ मेगावाट विद्युत् आयात भइरहेको र नेपालको उत्पादन जसोतसो १ हजार मेगावाट मात्र रहेको जानकारी दिँदै साँझको समयमा सर्वसाधारणको घरमा पनि लोडसेडिङ हुने अवस्था आएको बताएका छन् ।
विभागिय मन्त्रीको हैसियतले खड्काको दायित्व भनेको देशमा लोडसेडिङ नहुने प्रबन्ध गर्नु र नागरिकलाई बिजुली आउने कुरामा आश्वस्त पार्नु हो । तर उनले प्राधिकरणलाई विद्युत् आयात गर्न नदिएर ‘घरघरमा लोडसेडिङ हुँदै छ’ भनेर अफवाह फैलाएको देखिन्छ । यसले प्राधिकरणका कार्यकारी निर्देशक कुलमान घिसिङलाई गलत देखाउनकै लागि मन्त्री खड्काले पावर एक्सचेन्ज कमिटीको बैठकको सम्झौतामा आनाकानी गरेको आरोप लागेको छ ।
मन्त्री खड्काका पछिल्ला विवादास्पद अभिव्यक्तिहरूले उनलाई मन्त्रीको पदमा बसिरहने नैतिक प्रश्नमा धकेलिदिएको छ ।
सत्तापक्ष यसमा मौन छ । र उनलाई प्रधानमन्त्री केपी ओली र कांग्रेस सभापति शेरबहादुर देउवाको संरक्षण पनि छ । उनले संसदको रोस्ट्रममा उभिएर प्राधिकरणको नाफा कागजी भएको भनेका छन् जुन तथ्यभन्दा बाहिर छ ।
यसैबिच कुलमान घिसिङले अब कुनै पनि हालतमा लोडसेडिङ नहुने भनेका छन् । जसलाई ‘कालो बादलमा चाँदीको घेरा’को उपमा दिन सकिन्छ ।
२०७३ कात्तिकदेखि देशभर लोडसेडिङ हटाइएको थियो । तर मन्त्री खड्काको पछिल्लो भनाइले जनतालाई फेरि लोडसेडिङको युगमा फर्कनुपर्ने त्रासमा पारेको छ । खोला र नदीमा पानीको बहाव बढेसँगै विद्युत् उत्पादनमा सुधार भएको थियो जसले लोडसेडिङ अन्त्य गर्न मद्दत गर्यो ।
यदि मन्त्री खड्काले लोडसेडिङ गराउने प्रयास गरे भने यो सरकारको कार्यकाललाई कालो पोत्नेछ । उपभोक्ताले पुनः अँध्यारोको युगमा फर्कनु नपरोस भन्ने चासो व्यक्त गरेका छन् । कुलमानलाई बदनाम गर्ने र अँध्यारोका व्यापारीलाई नाफा दिलाउने सोचले मात्रै लोडसेडिङ गराउन खोजिँदा इतिहासमा यो सरकारको छवि बिग्रनेछ ।
