काठमाडौं : भारतीय राष्ट्रिय टिमका पूर्व कप्तान सुनिल क्षेत्रीले सन्यासको घोषणा गरेको एक वर्ष नबिल्दै राष्ट्रिय टिममा फर्किएका छन्। अखिल भारतीय फुटबल संघ (एआइएफएफ)ले सामाजिक सञ्जालमार्फत उनी राष्ट्रिय टिममा फर्कन लागेको जानकारी दिएको हो।
सामाजिक सञ्जालमा उनी एसिया कप क्वालिफार्यसको लागि टिममा फर्किएको बताइएको छ। ‘कुनै कथाहरु निरन्तरताका लागि बनेका हुनछन्।’ भन्दै फुटबल संघले सुनिलको फोटो पोष्ट गरेको छ।
प्रशिक्षक मानोलो मारक्वेजले सुनिलको अनुमति लिएर नै उनलाई राष्ट्रिय टिममा बोलाइएको खुलाएका छन्। उनले भनेका छन्, ‘एसिया कप हाम्रो लागि निकै महत्वपूर्ण छ। हामीले प्रतियोगिताको महत्वलाई मध्यनजर गर्दै सुनिल क्षेत्रीसँग कुरा गर्यो। उनीले सहमति जनाएका कारण हामीले उनलाई टिममा समावेश गरेका छन्।’ यस अगाडि उनले गत जुनमा सन्न्यास लिएको घोषणा गरेका थिए।
उनले भारतीय टिमका लागि १५० अन्तर्राष्ट्रिय खेल खेलिसकेका क्षेत्रीले ९४ गोल गरेका छन्। उनले अर्जुना, खेलरत्न तथा पद्मश्रीजस्ता प्रतिष्ठित पुरस्कार प्राप्त गर्ने खेलाडी हुन्। पुरुष फुटबलमा क्रिस्टियानो रोनाल्डो, लिओनल मेसी र इरानका अली दाईपछि सर्वाधिक अन्तर्राष्ट्रिय गोल गर्ने खेलाडीका रुपमा परिचित भारतीय स्ट्राइकर राष्ट्रिय टिममा फर्किएका हुन्छन्।
क्षेत्री बेंगलुरु एफसीबाट भारतीय सुपर लिग (आइएसएल) खेल्ने गर्थे। उनको अन्तिम अन्तर्राष्ट्रिय खेल २०२४ को जुन ६ मा कोलकातास्थित साल्ट लेक स्टेडियममा कुवेतविरुद्ध फिफा विश्वकप छनोट खेलेका थिए।
सन् २००२ मा मोहन बगानबाट आफ्नो व्यवसायिक यात्रा सुरू गरेका क्षेत्रीले भारतलाई २००७, २००९, २०१२ नेहरू कप तथा २०११, २०१५, २०२१, २०२३ का साफ च्याम्पियनसिप जिताउन महत्त्वपूर्ण भूमिका खेलेका थिए। सन् २००८ को एएफसी च्यालेन्ज कप जिताउँदै भारतलाई २७ वर्षपछि पहिलो पटक एएफसी एसियन कपमा छनोट गराएका थिए। उनले सन् २००५ मा पाकिस्तानविरुद्ध पहिलो अन्तर्राष्ट्रिय गोल गरेका थिए। सन् २०११ को साफ च्याम्पियनसिपमा ७ गोल गर्दै आइएम विजयनको रेकर्ड तोड्दै भारतको सर्वाधिक गोलकर्ता बनेका थिए।
