काठमाडौं । नेपाली कांग्रेसका नेता कृष्णप्रसाद सिटौलाले कम्तिमा राष्ट्रिय सभामा राजावादीहरू नभएको टिप्पणी गरेका छन् ।
संसदीय मामिला पत्रकार समाजले आयोजना गरेको राष्ट्रिय सभाको औचित्यतामाथिको छलफलमा उनले यस्तो बताएका हुन् ।
उनले राष्ट्रिय सभामा संघीयतावादी र संघीय लोकतान्त्रिक गणतन्त्रवादी रहेको भन्दै खुसी व्यक्त गरे ।
राष्ट्रिय सभामा कम्तिमा राजावादी छैनन् । हामीले राजा फ्याँक्नुपर्छ भनेका हौं । त्यहाँ सबै संघीयतावादी, लोकतान्त्रिक गणतन्त्र मान्ने मान्छेहरू छन् । हामी एकमत छौं । यो राम्रो पक्ष भएको बेलामा केही स्टेप अघि छौं,’ सिटौलाले भने ।
उनका अनुसार राष्ट्रिय सभाको आफ्नै फरक प्रकृतिको शैली छ ।फरक प्रसंगमा उनले प्रदेश र स्थानीय तहबारे संविधानमा भएको परिभाषा अनुसार अघि बढ्न नसकिएको बताए ।
‘खासगरी प्रदेश र स्थानीय तहको सन्दर्भमा जसरी संविधानले परिभाषा गरेको छ । त्यसमा काम गर्न सकिएको छैन । कतिपय साझा अधिकारको विषय छन् । प्रदेश र स्थानीय तहको बारेमा मात्रै कुरा गरिएको छ,’ सिटौलाले भने ।
राष्ट्रियसभाले संघीयताको कार्यान्वयनको सन्दर्भमा प्रदेश र स्थानीय तहका जनप्रतिनिधिको कुरा सुन्नुपर्ने उनको भनाइ थियो ।
